वेस्ट इन्डिजका विस्फोटक अलराउन्डर आन्द्रे रसेल नेपाल प्रिमियर लिग (एनपिएल) मा खेल्न पाउँदा निकै उत्साहित छन्।
नेपाली क्रिकेटरको प्रतिभा, उनीहरूको सिक्ने चाहना र टोलीको सकारात्मक वातावरणबाट प्रभावित रसेलले नेपालले भविष्यमा विश्वका ठूला क्रिकेट राष्ट्रलाई नियमित रूपमा हराउन सक्ने विश्वास व्यक्त गरेका छन्।
विराटनगर किंग्सबाट एनपिएल खेलिरहेका रसेलले नेपालमा बिताएको समय, नेपाली खेलाडीको क्षमता, यहाँको क्रिकेट वातावरण, खेलका चुनौती र आफ्नो व्यक्तिगत लक्ष्यबारे खुलेर कुरा गरेका छन्।
उनले नेपाली खेलाडीमा प्रतिभाको कमी नरहेको बताउँदै सही मार्गदर्शन, निरन्तर मिहिनेत र विनम्रताका साथ अघि बढ्न सके उनीहरूले अन्तर्राष्ट्रिय क्रिकेटमा ठूलो सफलता हासिल गर्न सक्ने बताए।
'नेपालमा धेरै प्रतिभाशाली खेलाडी छन्। उनीहरूमा केही गरेर देखाउने भोक छ। सही मार्गदर्शन पाए र आफूलाई निरन्तर सुधार गर्दै लगे भने नेपालले ठूला टोलीलाई हराउन सक्छ,' उनको भनाइको सार छ।
रसेलका अनुसार नेपालमा १५ देखि २० जनासम्म यस्ता खेलाडी छन्, जसमा उच्चस्तरको क्रिकेट खेल्ने क्षमता छ। राष्ट्रिय टोलीमा स्थान बनाउन धेरै खेलाडी प्रतिस्पर्धामा रहेको उनले अनुभव गरेका छन्। खेलाडीहरू राष्ट्रिय टोलीको ढोका ढकढक्याइरहेको र अवसर पाउन निरन्तर मिहिनेत गरिरहेको उनको बुझाइ छ।
नेपाली खेलाडीको सिक्ने चाहनाबाट पनि उनी प्रभावित छन्। आफूले जानेका कुरा सेयर र खेलाडीहरूलाई सिकाउन पाउँदा उनलाई खुसी लागेको छ।
डेथ ओभरमा ब्याटरकै मनोविज्ञान बुझ्छन् रसेल
एनपिएलमा रसेलको प्रभाव ब्याटिङमा मात्र सीमित छैन। कठिन परिस्थितिमा बलिङ गर्ने उनको अनुभव पनि उत्तिकै महत्वपूर्ण छ। विशेषगरी इनिङ्सको १९औं र २०औं ओभरमा बलिङ गर्दा उनी ब्याटरको मनोविज्ञान बुझेर योजना बनाउने गर्छन्।
आफू पनि लामो समयदेखि आक्रामक ब्याटिङ गर्दै आएको खेलाडी भएकाले ब्याटरले कुन अवस्थामा कस्तो सट खेल्न खोज्छ भन्ने कुरा अनुमान गर्न सक्ने उनको भनाइ छ। ब्याटरको सम्भावित योजना बुझेर त्यसको प्रतिकार गर्ने रणनीति बनाउनु नै डेथ ओभरमा उनको बलिङको मुख्य आधार हो।
'म आफै ब्याटर भएकाले यस्तो अवस्थामा ब्याटरले के सोचिरहेको हुन्छ भन्ने बुझ्न सक्छु। त्यसैअनुसार बलिङ गर्ने योजना बनाउँछु,' उनको भनाइको आशय छ।
मंगलबार जनकपुर बोल्ट्सविरूद्धको खेलमा पनि उनले यही अनुभव देखाए। ब्याटिङमा अविजित ५२ रन बनाएका रसेलले बलिङमा ४ विकेट लिएर विराटनगरलाई २ रनको रोमाञ्चक जित दिलाए।
१७५ रनको लक्ष्य पछ्याएको जनकपुरलाई अन्तिम ओभरमा १३ रन आवश्यक थियो। रसेलले दोस्रो बलमा कप्तान हरमित सिंहलाई आउट गरे भने अन्तिम बलमा अर्धशतक बनाएका सैफ हसनलाई क्याच गराए। अन्तिम बलमा जितका लागि ३ रन आवश्यक हुँदा उनले विकेट लिएर विराटनगरको जित सुनिश्चित गरेका थिए।
उनको यही प्रदर्शनले आफूलाई ब्याटिङ र बलिङ दुवैमा खेलको नतिजा बदल्न सक्ने खेलाडीका रूपमा फेरि प्रमाणित गरेको छ।
नेपालको पिच चुनौतीपूर्ण, त्यसैले खेल्न रमाइलो
रसेलले नेपालमा क्रिकेट खेल्नु अन्य स्थानको तुलनामा फरक अनुभव भएको बताएका छन्। यहाँका पिचमा बल कहिलेकाहीँ सट रहने र स्पिन हुने भएकाले ब्याटिङमा छिटो अनुकूल हुनुपर्ने उनको अनुभव छ।
उनका अनुसार आफूले चाहेजस्तो सबै बलमा ठूलो सट खेल्न सकिने अवस्था यहाँ हुँदैन। पिचको अवस्था बुझेर खेल्ने शैली परिवर्तन गर्नुपर्छ। यही चुनौतीले उनलाई नेपालमा क्रिकेट खेल्न थप रमाइलो बनाएको छ।
नेपालको क्रिकेटमा देखिएको प्रतिस्पर्धाले पनि उनलाई प्रभावित पारेको छ। यही कारण आगामी वर्ष पनि एनपिएल खेल्न नेपाल फर्किने इच्छा उनले व्यक्त गरेका छन्। नेपालमा खेल्ने चुनौती र यहाँका खेलाडीको प्रतिभा आफूलाई मन परेको उनको भनाइ छ। उनी अब एक खेल खेलेर फर्कदैछन्।
ड्रेसिङ रूमको वातावरणले जित्यो मन
रसेलले नेपाली टोलीको ड्रेसिङ रूमको वातावरणलाई आफूले अनुभव गरेका सबैभन्दा रमाइला वातावरणमध्ये एक बताएका छन्।
टोलीका खेलाडीहरू हँसिला, रमाइलो स्वभावका र एकअर्कासँग घुलमिल हुने खालका रहेको उनले बताए। एक साताभन्दा बढी समय मात्र टोलीसँग बिताए पनि वर्षौँदेखि चिनेजस्तो सम्बन्ध बनेको उनको अनुभव छ।
उनका अनुसार खेलाडीहरूले उनलाई ठूलो स्टारका रूपमा मात्र हेर्नेभन्दा पनि आफ्नै टोलीको सदस्यका रूपमा व्यवहार गरेका छन्। त्यसैले आफूलाई स्वाभाविक रूपमा प्रस्तुत गर्न र खेलाडीहरूसँग अनुभव साटासाट गर्न सहज भएको छ।
टोलीका खेलाडीहरूमा सिक्ने चाहना रहेको र उनीहरूसँग क्रिकेटका अनुभव बाँड्न पाउँदा खुसी लागेको पनि उनले बताए।
१० हजार रनको उपलब्धि र विश्वकै उत्कृष्ट बन्ने लक्ष्य
अन्तर्वार्तामा रसेलले आफ्नो व्यक्तिगत क्रिकेट यात्राबारे पनि चर्चा गरेका छन्।
रसेलले एपनिएलकै दौरान टी-२० क्रिकेटमा १० हजार रन पूरा गरेका थिए। उनले १० हजार रनको कोसेढुंगा पार गर्नुलाई आफ्नो करियरको महत्वपूर्ण उपलब्धिका रूपमा लिएका छन्। पाँच वर्षअघि नै आफूले यो लक्ष्य निर्धारण गरेको र अहिले पूरा गर्न पाउँदा खुसी लागेको उनले बताएका छन्।
तर उनी यत्तिमै सन्तुष्ट छैनन्। विश्वकै उत्कृष्ट फास्ट बलिङ अलराउन्डर बन्ने उनको महत्वाकांक्षा छ। ब्याटिङ र बलिङ दुवैमा प्रभाव पार्दै आफ्नो पहिचान अझ बलियो बनाउने उनको लक्ष्य छ।
नेपालको सुन्दरतामा विशेष आकर्षण
क्रिकेटबाहेक नेपालको प्राकृतिक सुन्दरताले पनि रसेलको मन जितेको छ।
विशेषगरी बिहान उठ्दा हिमालको सुन्दर दृश्य देख्न पाउनु आफ्नो लागि विशेष अनुभव भएको उनले बताएका छन्। बाल्यकालदेखि नै सगरमाथाबारे सुन्दै र यसको उचाइबारे जान्दै आएको उल्लेख गर्दै विश्वकै सर्वोच्च शिखर रहेको देशमा आउन पाउनु उनलाई विशेष लागेको छ।
नेपालको वातावरण, मौसम, स्वच्छता र यहाँका मानिसहरूको आत्मीय व्यवहारबाट पनि उनी प्रभावित छन्। नेपालमा बिताएको समय आफूले निकै रमाइलो गरिरहेको उनले बताएका छन्।
एनपिएलमा आफ्नो बाँकी एक खेल खेलेर यहाँको बसाइ पूरा गर्ने र आगामी वर्ष फेरि प्रतियोगितामा फर्किने उनको योजना छ।
-1793709064.png)
